މުޙައްމަދު އަމީނުގެ އަދަބީ ޚިދުމަތުގެ ދައުރަކީ ދިވެހި އަދަބީ ގުލްޝަނުގައި ގިނަގުނަ މާތަކެއް ފަރިވެ ފޮޅުނު ދުވަސްވަރެކެވެ. އެދުވަސްވަރު ޅެންވެރިކަމުގެ ގުލްޒާރުގައި މަޝްހޫރުވި އަދީބުންނަށް ޚާއްޞަ ވަނަމެއް ދެވުނެވެ. މީގެތެރެއިން ބައެއް ބޭފުޅުންގެ ވަނަންތަކަކީ އެބޭފުޅުން އަމިއްލަފުޅަށް ގެންގުޅުއްވި ނަންތަކެވެ. ނުވަތަ އެބޭފުޅުންގެ ޅެންތަކުގައި އެނަން މާގިނައިން ބޭނުންކުރެއްވުމުގެ ސަބަބުން ފަހުން އެބޭފުޅުންނަށް ނިސްބަތްކޮށް ދެވުނު ނަންތަކެވެ. މީގެތެރެއިން މިވަގުތު އަޅުގަނޑު އެންމެ ފާހަގަ ކޮށްލަން ބޭނުންވަނީ ބޮޑުފެންވަޅުގޭ ސީދީއަށް ނިސްބަތްކޮށް ބޭނުންކުރެވޭ "ޙިމާރުލްޤައުމު" މިނަމަށެވެ
ބޮޑުފެންވަޅުގޭ ސީދީ އަކީ އޭރުގެ ސަރުކާރުގެ ސިޔާސަތަށް ވަރަށް ބޮޑަށް ހަޖޫކިޔުއްވާ ޅެންހައްދަވަމުން ގެންދެވި ބޭފުޅެކެވެ. ބައެއްފަހަރު ބޮޑެތި އަދަބުތަކެއްވެސް ލިބިފައިވެއެވެ. މިގޮތަށް ޅެންހައްދަވާ އުޅުއްވާތީ އޭރުގެ ސަރުކާރުގެ އިސްބޭފުޅެއްގެ ފަރާތްޕުޅުން އެކަމާ ކޯފާއިސްކުރައްވާ އެއްދުވަހަކު ސީދީއާ މުޚާޠަބު ކުރައްވާ "އޭ މިހިރަ ޙިމާރާއޭ" ވިދާޅުވިކަމަށް ވެއެވެ. ހިމާރަކީ ޖަނަވާރުތަކުގެ ތެރެއިން އެންމެ އަޑު ހުތުރު ޖަނަވާރެވެ. އެހެންކަމުން ސީދީ ހައްދަވާ ޅެންތަކާހުރެ ދައުލަތުގެ އެފަދަ އިސްވެރިޔަކު އެފަދަ ލަގަބެއް ދެއްވުމުން ވަރަށް ފަޚުރުވެރިކަމާއެކު އެމަނިކުފާނު އަމިއްލަފުޅު ނަމަކަށް އެނަން ބޭނުންކުރެއްވީއެވެ. ޚާއްޞަކޮށް އޭގެފަހުން ސަރުކާރަށް ފާޑުވިދާޅުވެ ހެއްދެވި ކޮންމެ ޅެމެއްގައި "މިވާހަކަ މިދައްކަނީ ނުވަތަ މި ޚިޔާލު މިހުށެހެޅީ ޙިމާރުލްޤައުމު ކަން" ދޭހަވާގޮތަށް ޅެންބައިތެއްގައި "ޙިމާރުލްޤައުމު" މިނަން ބޭނުންކޮށްފައި އޮވެއެވެ
ދިވެހިއަދީބުންނަށް އެދުވަސްވަރު ދެވުނު ނަންތައް ބެއްލެވުމަށް ތިރީގައިވާ ލިންކަށް ފިއްތަވާލައްވާށެވެ
ޅެންވެރިކަމުގެ ބަގީޗާގައި ބައެއް ޅެންވެރިންނަށް ދެވިފައިވާ ނަންތައް
Subscribe to:
Post Comments (Atom)
No comments:
Post a Comment